Um árabil hefur Bóksala stúdenta séð nemendum Háskólans í Reykjavík fyrir kennslubókum og öðrum námsgögnum á sanngjörnu verði. Hingað til hafa nemendur HR sótt aðföng sín í verslun Bóksölunnar, sem er staðsett á Háskólatorgi við Háskóla Íslands.

Nú hefur verið ákveðið að auka þá þjónustu sem bóksalan veitir nemendum og starfsfólki HR og mun Bóksalan opna útibú frá verslun sinni í nýju húsnæði Háskólans í Reykjavík í Nauthólsvík. Til að byrja með munum við bjóða þar upp á allar þær námsbækur sem kenndar eru í HR, handbækur og ritföng. Einnig munum við bjóða upp á valið úrval af léttefni í vasabrotssniði, tímaritum og barnabókatitlum. Hvert framhaldið verður í vöruúrvali ræðst síðan af eftirspurn.

Opnunartími Bóksölunnar í Nauthólsvíkinni verður frá og með mánudeginum 11. janúar 2010 og til og með föstudagsins 29. janúar 2010 virka daga frá kl. 11.00 til 16.30. Komi í ljós þörf fyrir breyttan afgreiðslutíma frá og með þeim tímapunkti munum við auglýsa það sérstaklega. 

Starfsfólk Bóksölu stúdenta