Hér er viðtalsbók um 38 konur þar sem brugðið er upp myndum úr hversdagslífi og störfum kvenna fram á þennan dag. Lesa má um uppeldi, mat og menntun, kvennabaráttu, verndun húsa, félags- og frumkvöðlastörf, veikindi og missi, lífsbaráttu og sjálfsbjargarviðleitni en líka vináttu og samhjálp góðra granna. Jónína Vålerhaugen á þrjú viðtöl í bókinni.
Konurnar á Eyrarbakka fjallar um líf og störf kvenna í sjávarþorpi sem eitt sinn var aðalverslunarstaður Suðurlands. Eyrarbakki er ríkur af sögu kvenna, sögu um lífið innan og utan heimila og milli húsa sem einhvern veginn var meira samtvinnað en það er í dag. Hjálpsemi, nýtni og þrautseigja einkenndi tilveruna þar sem konur höfðu stóru hlutverki að gegna í ósýnilegu hagkerfi en voru aldeilis ekki ósýnilegar þá frekar en nú – þó ekki hafi farið miklar sögur af þeim.
Í bókinni eru viðtöl við konur og viðtöl við ættingja, konur og karla, um konur sem eru fæddar á tæplega hundrað ára tímabili, ýmist innfæddar, aðfluttar eða brottfluttar. Ekki eru sagðar sérstakar frægðarsögur heldur sögur af hversdagslífi og störfum kvenna sem hafa breyst í áranna rás.
Umsagnir:
Linda Ásdísardóttir safnafræðingur á Byggðasafni Árnesinga
Ég er mjög hrifin af verkinu og finnst takast á undraverðan hátt að skrifa þannig að persónueinkenni hverrar konu njóti sín.
Þórey Vilhjálmsdóttir Proppé framkvæmdastjóri Empower
Mikilvægt framlag til kvennasögunnar og fyrir mig að fá innsýn í líf formæðra minna á Eyrarbakka í tæp hundrað ár.