Hér er tekið mið af bókmenntaformi stafrófskveranna gömlu, kennslubóka sem höfðu það hlutverk að vígja börn og ungmenni inn í töfraheima leslistarinnar. Með óvanalegum verkum sem leika á mörkum hins uppdiktaða og sanna, skáldskapar og fræða, hefur höfundurinn skapað sér sérstöðu í íslenskum bókmenntum.
Milli spjalda þessa 21. aldar „stafrófskvers“ fer bæði fram uppátækjasöm könnun á orðlist, bókfræði og lestrarvenjum auk þess sem farið er víða um sálarsviðið og lendur hjartans. Lexíurnar sem höfundur miðlar eru af margvíslegum toga, bæði þroskavænlegar og óábyrgar. En allar eiga þær sameiginlegt að hverfast um þetta sem Jóhannes Kjarval sagði eitt sinn um veraldarvolkið: að það er jú heilmikið fyrirtæki að vera manneskja.
Lexíurnar er nýtt skref í þróun framsækins og spennandi höfundarverks Magnúsar Sigurðssonar.