Bóksala stúdenta hefur verið rekin af Félagsstofnun stúdenta (FS) frá stofnun fyrirtækisins árið 1968 en sala námsbóka var áður á vegum Háskóla Íslands og Stúdentaráðs HÍ. Meginmarkmið hefur frá upphafi verið að útvega stúdentum við Háskóla Íslands kennslubækur og önnur námsgögn á sanngjörnu verði. Í áranna rás hefur umfangið og þjónustan aukist verulega og í dag útvegar Bóksalan öllum háskólum landsins og fjölda framhaldsskóla námsgögn og stofnunum fag- og fræðirit. Bóksala stúdenta er ekki hagnaðardrifin verslun og er verðlagi haldið niðri eins og kostur er.

Síðustu ár hefur vöruúrval Bóksölunnar breyst og orðið fjölbreyttara. Auk fjölda bóka af ýmsum toga býr verslunin yfir úrvali ritfanga, vörum merktum Háskóla Íslands og smá- og gjafavörum í Kaupfélagi stúdenta, sem staðsett er í versluninni.

Bóksala stúdenta er á Háskólatorgi, í hjarta háskólasamfélagsins. Verslunin er opin öllum innan og utan Háskólasvæðisins og úrvalið við allra hæfi, jafnt barna sem fullorðinna.

Allar vörur í búðinni má finna í vefversluninni okkar boksala.is. Þar er að auki fjöldi annarra bóka sem og rafbækur, en einnig er hægt að sérpanta bækur hvaðanæva úr heiminum.

Bókakaffi stúdenta er staðsett í Bóksölu stúdenta. Þar er boðið upp á hágæða kaffidrykki í samstarfi við Te&Kaffi og úrval annarra veitinga.

Upplagt er að tylla sér í Bókakaffinu, fletta í blöðum og bókum, hlaða snjalltæki og tölvur og njóta þess að slaka á og fylgjast með mannlífinu á torginu.

Ýmsir viðburðir fara reglulega fram í Bókakaffinu, svo sem upplestrar, kynningar og útgáfur bóka.

Bóksala stúdenta er staðsett á Háskólatorgi í Háskóla Íslands. Þó hún sé kennd við stúdenta og verðlag sniðið að peningaveski þeirra er hún opin öllum. Verslunin er lífleg og skemmtileg með fjölbreytt vöruúrval fyrir nemendur á öllu skólastigi og bækur við allra hæfi, börn og fullorðna, bæði afþreyingar- og námsbækur.

Í versluninni telur úrval bóka að jafnaði um 12.000 titla. Í gegnum erlendan samstarfsaðila hefur Bóksalan aðgang að vöruhúsi sem hýsir um 400 þúsund titla prentaðra bóka hverju sinni sem hægt er að panta á vefversluninni okkar og fá afhentar á skömmum tíma.