Eftir þrjátíu ára leit að bata tókst Steindóri Jóhanni Erlingssyni loksins að snúa vörn í sókn í baráttu sinni við ægivald þunglyndis og kvíða. Allan þennan tíma hefur þessi geðröskun fylgt honum sem áleitinn skuggi. Baráttan hefur verið ströng og oft tvísýn. Stundum hefur vonleysið og löngunin til að binda enda á lífið borið hann ofurliði. Í þrígang reyndi hann að ganga alla leið.
Hér fjallar Steindór á einlægan hátt um glímu sína, hvernig hann hefur leitað að haldreipi í bókmenntum og hugsuðum fyrri tíma, heimsótt geðlækna, tekið geðlyf, legið inni á geðdeildum og unnið með meðferðarhópum utan heilbrigðiskerfisins. En það var ekki fyrr en hann fór að skoða áföll í fortíðinni að bataferlið hófst.
Einstök bók um mann sem þurfti að ferðast um djúpan dal lungann úr ævi sinni en hefur nú endurheimt lífið.
Steindór er doktor í vísindasagnfræði og höfundur einnar bókar, auk fjölmargra fræði- og blaðagreina.