Birna Þórðardóttir hefur alla sína tíð verið í fylkingarbrjósti þar sem fólk berst fyrir betra þjóðfélagi og gegn stríði og ranglæti. Undanfarna hálfa öld hefur hún verið landsmönnum ein helsta táknmynd andstöðunnar við smáborgaraskap og ríkjandi kerfi og mörgum fyrirmynd; hnarreistur aðgerðasinni með hnefann krepptan.
Birna ætlaði sér alltaf að skrifa sögu sína en atvikin höguðu því svo að ekki varð af því. Í þessari einstæðu bók fylgja þær henni á æskuslóðir á Borgarfirði eystra, vinkona hennar og skrásetjari sögunnar, Ingibjörg Hjartardóttir, og ljósmyndarinn Rannveig Einarsdóttir. Um leið er ævi Birnu rakin í máli og myndum, frá því hún sleit barnsskónum fyrir austan, fór síðan til Akureyrar í menntaskóla og loks suður þar sem hún gekk til liðs við byltinguna.
Hér lifna kunnar persónur úr bóhemlífinu í Reykjavík og sagt er frá ýmsum uppátækjum hinna litríku byltingarsinna í Fylkingunni um leið og við kynnumst líka konunni bak við goðsögnina.